मिरज शहरातील चोगुले मळा, झोपडपट्टी, म्हैशाळ रोड परिसरात तडीपार आरोपी फिरत असल्याची माहिती गुन्हे प्रकटीकरण शाखेला मिळाली होती. त्यानुसार पोलिसांनी तात्काळ कारवाई करत शानूर करीम मुजावर (वय ३८, रा. चोगुले मळा, मिरज) याला अटक केली.
उपविभागीय दंडाधिकारी मिरज यांनी दिलेल्या आदेशानुसार आरोपीला सांगली जिल्ह्यातून दोन वर्षांसाठी तडीपार करण्यात आले होते. मात्र कोणतीही पूर्वपरवानगी न घेता तो मिरज शहरात वास्तव्यास असल्याचे आढळून आले.
या प्रकरणी मिरज शहर पोलीस ठाण्यात महाराष्ट्र पोलीस अधिनियम कलम १४२ अन्वये गुन्हा दाखल करण्यात आला आहे. आरोपीविरुद्ध यापूर्वीही खून, मारामारी, जबरी चोरी तसेच धारदार शस्त्र बाळगण्यासारखे गंभीर गुन्हे दाखल असल्याची माहिती पोलिसांनी दिली आहे.
